Бүгүн, муус устар 3 күнүгэр Таатта улууһугар «Олохтоох нэһилиэнньэни – бырамыысыланнаска» бырайыак иитинэн бөдөҥ тэрилтэлэр бэрэстэбиитэллэрэ кыттыылаах үлэ дьаарбаҥката буолан ааста.
Бу бөлөҕү СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин солбуйааччы Георгий Борисов салайан аҕалла. Кинини кытта АО «Алмазы Анабара», ПАО ЯТЭК, ООО “Нордголдменеджмент” Москва куорат, УЦ «Фаворит» бырамыысыланнай хампаанньыйалар уонна өрөспүүбүлүкэ Министиэристибэлэрэ бааллар.
Саха Өрөспүүбүлүкэтин нэһилиэнньэ дьарыктаах буолуутугар судаарыстыбаннай кэмитиэтэ икки бырайыагы үлэлэтэр “Тыа сиригэр дьарыктаах буолуу”, «Олохтоох каадыры — бырамыысалынаска». Бырайыактар тыа сиригэр үлэтэ суох буолууну аччатыыга туһуланаллар.
Саха сирин олохтоохторо «Демография» национальнай бырайыак чэрчитинэн «Тыа сиригэр дьарыктаах буолуу» бэдэрээлинэйдээҕи тосхолунан саҥа идэлэри баһылыыллар. Маны тыа хаһаайыстыбатын, үлэ уонна социальнай сайдыы, урбаан, атыы-эргиэн уонна туризм министиэристибэлэрэ уонна нэһилиэнньэ дьарыктаах буолуутун судаарыстыбаннай кэмитиэтэ тэрийэн ыыталлар.
Кэлиҥҥи сылларга «Олохтоох каадыры — бырамыысалынаска» бырагыраама көдьүүстээхтик үлэлээн, үлэтэ суох дьон, техническэй үөрэхтээх ыччат бырамыысалынай тэрилтэлэргэ үлэлиир-хамныыр буолла.
Улуус дьаһалтатын аактабай саалатыгар ыытыллыбыт мунньахха Тааттатааҕы дьарыктаах буолуу киинин үлэһиттэрэ, промышленнай тэрилтэлэр представителлэрэ, нэһилиэк баһылыктара, тэрилтэлэр салайааччылара, Н.Е.Мординов-Амма Аччыгыйын аатынан Харбалаахтааҕы үөрэх комплекса быйылгы выпускниктара, улуус оскуолаларын үөрэнээччилэрэ, үлэ көрдүүр дьон кыттыыны ыллылар. Бырамыысалыннай тэрилтэлэр үлэлэрин, туох үлэһиттэр наадаларын, хамнастарын тустарынан сэһэргээтилэр.
Ол кэнниттэн бөдөҥ тэрилтэлэр үлэ дьаарбаҥкатын тэрийдилэр, тус көрсүһүүлэри ыыттылар. Манна үлэ көрдүүр дьон интэриэһиргээбит үлэлэригэр анкета толордулар. Кэнники тэрилтэлэр сөптөөх диэбит дьоннорун үлэҕэ ыҥырыахтара. Бу хампаанньыйалар бэйэлэрэ эмиэ үөрэтэр киинэрдээхтэр. Онон, анал үөрэҕим суох диэн олорбокко, баҕа эрэ баар буоллар, ханнык баҕарар киһи үөрэҕи баһылаан үлэлиэн сөп.
Елена Слепцова.
https://таатта.рф/taatta-ychchata-byramyysylannaska-tardyhar/